ଶ୍ରୀମନ୍ଦିର ପରମ୍ପରାରେ ମହାଦୀପ

ଶ୍ରୀମନ୍ଦିରରେ ପ୍ରତ୍ୟେକ ଏକାଦଶୀ ଦିନ ରାତ୍ରରେ ଏହି ମହାଦୀପ ଆଳତି ହୁଏ । ଏହା ପୂର୍ବରୁ ସନ୍ଧ୍ୟା ଧୂପ ପରେ ଗରୁଡ଼/ଚୂନରା ସେବକ ତିନୋଟି ରୂପା କଳସ ଆଣି ସେଥିରେ କଞ୍ଚା କଦଳୀ ବାସୁଙ୍ଗାରେ ନୂଆ କନା ଗୁଡ଼ାଇ, ଘିଅ ଦ୍ବାରା ବଳିତା ନିର୍ମାଣ କରିଥାନ୍ତି । ଏହି ଘୃତପୂର୍ଣ୍ଣ କଳସ ଗୁଡିକରେ ବାସୁଙ୍ଗା ବୁଡି ରହିଥାଏ ଓ ବଳିତା କାଠି ଉପରକୁ ଥାଏ । ତାପରେ ଏହାକୁ ସମ୍ପୃକ୍ତ ସେବକ ରତ୍ନ ସିଂହାସନ ପାଖକୁ ନେଇ ଯାଇଥାନ୍ତି । ତାପରେ ତିନି ବାଡ଼ରେ ପୂଜାପଣ୍ଡା ସେବକ ଏହି ବଳିତା ଗୁଡିକୁ ସଂସ୍କାର କରି ମହାଦୀପ ଆଳତି କରନ୍ତି । ଏହି ମହାଦୀପ ରତ୍ନ ସିଂହାସନର ଚତୁଃପାର୍ଶ୍ୱ ପରିକ୍ରମା କରି ଜୟ ବିଜୟ ଦ୍ୱାର ଦେଇ ମା ବିମଳାଙ୍କ ମନ୍ଦିର ପର୍ଯ୍ୟନ୍ତ ଯାଇଥାଏ । ଏହି ସମୟରେ ଘଟୁଆରି, ଚୂନରା ସେବକଙ୍କୁ ବାରଟି ଚନ୍ଦ୍ରଉଦିଆ ଦିଅନ୍ତି ଓ ଚୂନରା ସେବକ ଶ୍ରୀନୀଳଚକ୍ରଙ୍କ ପାଇଁ ଉଦ୍ଦିଷ୍ଟ ତୁଳସୀ, ଚନ୍ଦନ ଆଦି ପୂଜାପଣ୍ଡାଙ୍କ ଠାରୁ ନେଇଥାନ୍ତି । ତାପରେ କଳସ ରଖିଦେଇ ମହାଦୀପ, ଚନ୍ଦ୍ରଉଦିଆ ଧରି ତିନିଜଣ ଚୂନରା ସେବକ ମନ୍ଦିର ଉପରକୁ ଯାଆନ୍ତି । ସାଙ୍ଗରେ ସେମାନେ ନଡ଼ିଆ କତା ଲଗାଇ ନିଆଁ ନେଇଥାନ୍ତି । ଶ୍ରୀମନ୍ଦିର ଶୀର୍ଷରେ ପହଞ୍ଚିବା ପରେ ଦଧିନଉତି ତଳେ ଦଣ୍ଡାୟମାନ ହୋଇ ସେମାନେ ତୁଳସୀ, ଚନ୍ଦନ ଆଦି ଶ୍ରୀନୀଳଚକ୍ରଙ୍କୁ ଲାଗି କରି ମହାଦୀପ ଓ ଚନ୍ଦ୍ରଉଦିଆ ଲଗାଇ “ହରି ବୋଲି ବୋଲ ହେ ! ହରି ବୋଲି ବୋଲ ହେ ! ହରି ବୋଲି ବୋଲ ହେ !” ଏହିପରି ତିନିଥର ଉଚ୍ଚାରଣ ପୂର୍ବକ ଅଁଳା ବେଢ଼ାକୁ ତିନି ଘେରା ପରିକ୍ରମା କରିଥାନ୍ତି ଏବଂ ପ୍ରତ୍ୟେକ ଦିଗରେ ତିନୋଟି ଲେଖାଏଁ ଚନ୍ଦ୍ରଉଦିଆ ଜାଳନ୍ତି । ପରିକ୍ରମା ସମୟରେ ସମ୍ପୃକ୍ତ ଚୂନରା ସେବକ ମହାପ୍ରଭୁ ଓ ବର୍ତ୍ତମାନର ପୁରୀ ଗଜପତି ମହାରାଜାଙ୍କର ନାମ ଉଚ୍ଚାରଣ କରି ନିମ୍ନ ପ୍ରକାରରେ ମଙ୍ଗଳକାରୀ ଡାକ ଦେଇଥାନ୍ତି ।

“ବୀରଶ୍ରୀ ଗଜପତି ଗୌଡେଶ୍ୱର ନବକୋଟି କର୍ଣ୍ଣାଟୋତ୍କଳ କଳବର୍ଗେଶ୍ୱର ଅଭିରାୟ ଭୂତ ଭୈରବ ଅନିକରଣେ ରାଉତରାୟ ଦୁଃସହ ଦୁଃଶାସନ ଅତୁଳବଳ ପରାକ୍ରମୀ ସଂଗ୍ରାମେ ସହସ୍ରବାହୁ କ୍ଷତ୍ରିୟକୁଳ ଧୂମକେତୁ ବୀରାଧିବୀରବର ଶ୍ରୀ ଶ୍ରୀ ଶ୍ରୀ ଦିବ୍ୟସିଂହ ଦେବ ମହାରାଜାଙ୍କୁ ଶଙ୍ଖେ ପୁରାଇ ଚକ୍ର ଆଢୁଆଳ କରି ରଖିବା ହେଉ ହେ ମହାପ୍ରଭୁ ! ସଂସାର ସୁଖୀ ରଖ ହେ ମଣିମା !”

ଭୟଙ୍କର ଝଡ଼ ତୋଫାନରେ ମଧ୍ୟ ମହାପ୍ରଭୁଙ୍କର ଏହି ନୀତି ସ୍ଥଗିତ ହୋଇ ନଥାଏ । ଏହିପରି ଭାବରେ ଚୂନରା ସେବକ ମାନେ ଅତି ନିଷ୍ଠାର ସହିତ ଏହି ମହାନ ନୀତିକୁ ସମ୍ପାଦନ କରିଥାନ୍ତି । ଏହି ମହାଦୀପର ଦର୍ଶନ କରି ଶ୍ରୀକ୍ଷେତ୍ରରେ ଏକାଦଶୀ ବ୍ରତାଚାରୀ ମାନେ ନିଜର ଏକାଦଶୀ ବ୍ରତ ସମ୍ପନ୍ନ କରିଥାନ୍ତି । ମହାପ୍ରଭୁ ଶ୍ରୀଜଗନ୍ନାଥଙ୍କର ଲୀଳା ଅପୂର୍ବ ଓ କଲ୍ୟାଣକର । ସେ ଏହିପରି ଭାବେ ତାଙ୍କର ଭକ୍ତଙ୍କର ମନସ୍କାମନା ସବୁକୁ ପୂର୍ଣ୍ଣ କରୁଥାନ୍ତୁ ଓ ଗଜପତିଙ୍କୁ ସୁରକ୍ଷା ଦେବା ସହିତ ସଂସାରର ମଙ୍ଗଳ ସାଧନ କରୁଥାଆନ୍ତୁ ।

ଜୟ ଜଗନ୍ନାଥ !